فائدة الدش والبوتوث

اهلين
هذا موضوع قديم, كتبته من فترة لكن ما نزلته
بس اعتقد انه ما زال حلو, خاصة وان المشاكل اللي يتكلم عنها, مازالت موجودة


حديث قصير دار بيني وبين احد الأصدقاء … وأحببت أن أطرحه …( وسيكون بالعامي )

و لأضعكم في الصورة…فإن بداية الحديث كانت لتعليقي على صديقي … بأنه يصلح يمثل في ستار اكاديمي ض1

اعترض صديقي وبدأ يتفلسف علي … ويعطيني أرآءه … أو بالاصح … ينقل لي آراء غيره … لانه مثل الكثيرين في مجتمعنا … لا يحبون التفكير … بل يحبون نقل أرآء الغير … لانها جميلة بدون التفكير في حقيقتها.

هو – ياخي انت ما تفهم .. والله ما تفهم .. ترى حنا محاربيين … تفهم وش معنى محاربين… ما تشوف الغرب كل يوم يرسل علينا خرابيطه عشان يضيعون الشباب هنا… والله انهم عرفوا (من أين تؤكل الكتف)

أنا –  يااااهوووووووووووووووه … والله حلوة الكتف هذه … متعوب عليها ….. من وين جبتها

بس من جد … ترى  ما أذكر  شفت الخرابيط هذه اللي ارسلها الغرب…ومعليش… وش هي الخرابيط هذه اصلا.. أبي افهم؟

هو – تستهبل انت ووجهك…!

اول واخطر شي منها … الدش … دخلوه علينا بعد حرب الخليج… وشف بلاويه الحين … وشف الفضائيات والقنوات الاباحية والاغاني والبنات … ولا تنسى البرتقالة … ورح شف البيوت اللي خربت بسبب الدش فقط

طيب … وعندك البلوتوث….!

يعني بذمتك … مرضيك الصور اللي تطلع … وصور بنات الروضة…! وفضيحة برجس…؟

والبلاوي اللي سببها لنا البلوتوث….؟

ولا … الترقيم صار أسهل الحين … يعني رح للمواقف حقت السوق … ورقم مناك … ما يحتاج تدخل السوق…! (أنا تو دريت بالحركة هذه .. والله ماهم بسيطين الغزلنجية…!)

أنا- يا بو الشباب… ض1

معليش …تراك قلبت الحقائق … المفروض تمدح الغرب مو تسبه بسبب الأشياء هذه اللي انت تتكلم عنها

هو – قصدك يعني عشان التقنية….؟ ما نبيها … أهلنا كانوا عايشين بدون التقنية ومستانسين…!

أنا – التقنية سبب صغير عشان نشكرهم عليها… لكن السبب الكبير … هو الفضائح اللي طلعت من ورى التقنية هذه …!

هو – شلون يعني … نشكرهم عشانهم جابو التقنية اللي طلعت لنا الفضائح وسوت لنا مشاكل…؟

أنا – شفت انك انت تنكة … وعلى كبر راسك ما تفهم ض1 … وأصلا ما عندك سالفة … والكلام هذا تسمعه من جاركم المطوع الفيلسوف وتجي تسوي فيها علينا ض1

شف يا ذكي

أما الدش …. فـ هو نعمة … تدري ليه ..؟

أولا … خلانا نشوف العالم …ونطلع من الحصار اللامرئي اللي كان مفروض علينا

ياخي كنا معزولين مانعرف شي عن العالم … وحتى العالم ما يعرف عنا شي … كان يحسبونا بدو في الصحراء .. وجنب كل واحد خيمة وبرميل نفط…!

وحنا .. كنا نحسب الغرب كفار … ولازم نقتلهم … وأنهم يبون يقتلوننا … وأنها الحرب حتى الموت … ولا صلح … ومدري ايش

 كنا باختصار العوبة في أيدي بعض الفئات في المجتمع … اللي تبي تمشي أفكارها علينا

وبعدين .. بالنسبة للقنوات الاباحية… ياخي مو حنا مجتمع إسلامي…! وش يخلي المسلم يروح يتابع القنوات الاباحية…؟ ليه ما يحذفها اساسا من الرسيفر…؟

فيه قنوات خليجية … مثل السعودية واحلى بعد … وبرامجها مو معادة… مثل افلام القناة الثانية … ذبحونا بـ افلام مقايفر … حنا كبرنا وهو ما كبر…!

وأما القنوات الغنائية … فهذه يا غلا … أحلى شي … تدري ليه …؟

لأن الغرب ماله علاقة فيها … القنوات اصحابها خليجين …واللي يدعمها حنا … كيف…؟ عن طريق رسائل المسجات اللي تدر الذهب على القناة… وتخليها تستمر

وأما البرتقالة … فيا غلا … هذه بعد نعمة … تدري ليه..؟

لأنها خلتنا نعرف حنا لقد ايش عقولنا ضعيفة … سواء الكبار أو الصغار … بيوت كثيرة خربت بسبب البرتقالة .. وكبار السن … صارو يتابعونها قبل الصغار… ليه ..؟ وين راحت المبادئ والقدوة …؟

همهم الاول …مطاردة شهواتهم … وفضحتهم البرتقالة قدام الناس… تقدر تنكر يا حلو

هذا معناه أن فيه شي خطأ في المجتمع … بس الجميع يكابر ومو راضي يعترف.

بعدين بالنسبة للبلوتوث … فهو أداة … جهاز .. ماله ذنب … مثل الدش

الذنب على اللي يستعمله بأسلوب خاطئ.

لكن البلوتوث … ترى فائدته اقوى من الدش … لانه طلع لنا فضائح المجتمع الخافية

خلانا ندري … حنا على أيش عايشين… خلانا نعرف حقيقتنا وحقيقة المجتمع المثالي

يعني فضائح البنات  مع ابو الهش ض1 … وبنات الروضة  😦  …. وبرجس النذل … وصور اغتصاب البنات مع السواقيين… وصور النساء الكبيرات….ووووووووووو…؟ وين راح المجتمع والتربية الاسلامية…؟

وصور شبابنا في الخارج … وكل واحد راز نفسه مع بنت..؟ حتى الاساتذة في المدارس طلعت فضائحهم… وعرفنا لقد ايش تفكيرهم محدود…؟

تدري … انا شايف فلم رقص غربي … في جامعة الامام…؟ تخيل في جامعة الامام…؟ بس والله يرقص الولد ض1

وأما المغازلة ومدري ايش بالبلوتوث … فيا قلبووو … ما احد قالك اهمل ولدك وبنتك … وخلهم يتربون على الفساد … وعلاوة على كذا … تشتري لهم بلوتوث وما تبيهم يضيعون..؟

انت المخطأ مو مهم … بس صح نسيت … المخطأ مو انت ولا اولادك … المخطأ الغرب اللي علمنا أن عيالنا ضايعين…!

ياخي حنا نحب نلقي التهم على الآخرين …وصرنا صراحة محترفين في القاءها

لكننا مع كذا… جبناء  … ما نقدر ننظر للمرآة … ونتهم المجرم الحقيقي …😦

ياخي بالعكس …. تدري … المفروض حنا نشكر الغرب

وهذا شي … حتى السلف الصالح امرونا نسويه … تدري كيف…؟ أشرح لك…:)

مو السلف الصالح يقولون … رحم الله امرأ أهدى إلي عيوبي…؟

طيب الغرب … أهدى لنا الفضائح والبلاوي اللي ما كنا نشوفها …ليه مانشكرهم…؟

أقول  يا بعدهم … ياليت لو تفكر زين في الكلام الي انت قلته … عشان تدري أن كلامك انت واللي نقلته منهم …هو الخرابيط وانكم ما عندكم سالفة …😦


انتهى

 واتمنى اعجبكم  الموضوع

تحية

 

This entry was posted in Uncategorized. Bookmark the permalink.

2 Responses to فائدة الدش والبوتوث

  1. sou says:

    اممممممممممممم….اولا عندك حق فى حكاية نقل الاراء بدل التفكير …بقت شاملة على العرب ككل …اصبحوا فى وضع المشاهد و ساعات فى وضع المتعجب اللى يعرف الخبر بعد الهنا بسنة على قولتنا فى مصر
    ثانيا:اول مرة اقرء راى حد بيناقش الموضوع دة بالطريقة دى…
    good luck

  2. NaDeR says:

    هذه مشكلة, اي شي عندنا ننظر له بشكل ديني وعاطفي
    بدلا من استخدام العقل بالشكل الصحيح للحكم على الأشياء

    يعني لما البلوتوث يظهر لنا المشاكل في المجتمع
    نبدأ ننتقد البلوتوث, بدلا من ان ننتقد المجتمع
    وضحت الفكرة😀
    المجتمع عندنا متكبر
    ولا أحد يرضى انه يتكلم بشكل صريح
    لانه راح يكون كبش فداء

    والســـلام خير كلام

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s